Presidenti i Federatës së Futbollit të Kosovës (FFK), Agim Ademi, ka marrë pjesë në ceremoninë e organizuar nga Ambasada e Shteteve të Bashkuara të Amerikës në Kosovë, me rastin e shënimit të 250-vjetorit të shpalljes së Pavarësisë së SHBA-së.

Përmes një postimi në rrjetet sociale, Ademi bëri të ditur se në këtë ngjarje ishte i shoqëruar nga nënkryetari i FFK-së, Bakir Burri, anëtari i Komitetit Ekzekutiv, Samir Ujkani, trajneri i Kombëtares së Kosovës, Franco Foda, drejtori i Kombëtares, Muharrem Sahiti, si dhe menaxheri i Kombëtares, Bajram Shala.

Ademi theksoi se Kosova dhe Shtetet e Bashkuara ndajnë një miqësi të veçantë dhe një partneritet të ndërtuar mbi vlera të përbashkëta, besim dhe mbështetje të vazhdueshme.

“Për ne, SHBA-ja mbetet një aleate e pazëvendësueshme dhe një mike e madhe e popullit të Kosovës”, ka shkruar ai.

Presidenti i FFK-së nënvizoi gjithashtu rolin e sportit, veçanërisht futbollit, si urë që afron njerëzit dhe forcon lidhjet ndërmjet vendeve.

Ai e cilësoi simbolik faktin që SHBA-ja po shënon këtë përvjetor jubilar në prag të organizimit të Kupës së Botës 2026, duke theksuar se futbolli vazhdon të bashkojë kombe, kultura dhe miliona tifozë në mbarë botën.

Në fund, Ademi uroi Shtetet e Bashkuara për 250-vjetorin e Pavarësisë dhe shprehu mirënjohje për Ambasadën Amerikane për ftesën dhe mikpritjen, si dhe falënderoi popullin amerikan për mbështetjen e vazhdueshme ndaj Kosovës ndër vite.