Presidenti i Federatës së Futbollit të Kosovës (FFK), Agim Ademi, ka pritur në takim Shqiptar Gubetinin, nënkryetar të FSHFGj-së dhe kryetar të klubit FC Kosova Regensburg, të cilin e ka falënderuar për kontributin e tij në zhvillimin e futbollit shqiptar në diasporë.

Përmes një postimi, Ademi ka vlerësuar angazhimin e Gubetinit dhe të mërgatës shqiptare në ruajtjen dhe promovimin e lidhjeve me Kosovën, veçanërisht përmes futbollit.

Ai ka theksuar se mërgata ka qenë gjithmonë një nga shtyllat më të fuqishme të vendit, duke kontribuar në fusha të ndryshme, si dhe duke i qëndruar pranë Kosovës në periudha të rëndësishme historike.

Ademi ka vënë në pah edhe rolin e prindërve shqiptarë në diasporë, të cilët, sipas tij, ua kanë përcjellë fëmijëve dashurinë për vendin e origjinës, ndërsa shumë të rinj po vijnë për ta përfaqësuar Kosovën edhe në futboll.

Ai ka shprehur mirënjohje për FSHFGj-në dhe klubet e saj për punën dhe bashkëpunimin, duke theksuar rëndësinë e lidhjeve mes Kosovës dhe mërgatës.

“Mërgata jonë ka qenë, është dhe do të mbetet gjithmonë krenaria dhe forca e Kosovës!”, ka shkruar Ademi.