Presidenti i Federatës së Futbollit të Kosovës (FFK), Agim Ademi, ka pritur në takim ish-futbollistin e Kombëtares së Kosovës, Enis Alushin.

Ademi ka thënë se takimi me Alushin ishte i veçantë, duke e vlerësuar kontributin e tij në një periudhë të rëndësishme për futbollin kosovar.

“Sot pata kënaqësinë e veçantë ta pres në vizitë Enis Alushin, ish-futbollistin e Kombëtares së Kosovës dhe një prej atyre djemve që me krenari e përkushtim e kanë përfaqësuar fanellën dardane”, ka shkruar Ademi.

Gjatë takimit, sipas tij, janë rikujtuar momentet nga Kombëtarja, ndërsa është diskutuar edhe për zhvillimin e futbollit të Kosovës ndër vite dhe të ardhmen e tij.

“Takimet me ish-futbollistët e Kombëtares gjithmonë zgjojnë emocione të veçanta, sepse secili prej tyre është pjesë e historisë dhe rrugëtimit të futbollit tonë”, ka theksuar Ademi.

Ai ka vlerësuar profesionalizmin, karakterin dhe dashurinë e Alushit për Kosovën, duke thënë se ai ka dhënë kontributin e tij në një periudhë shumë të rëndësishme për futbollin kosovar.

Në fund, Ademi ka theksuar se dyert e FFK-së do të jenë gjithmonë të hapura për ish-futbollistët e Kombëtares dhe për të gjithë ata që kanë kontribuar në zhvillimin e futbollit të Kosovës.

“Dyert e Federatës do të jenë gjithmonë të hapura për secilin ish-futbollist të Kombëtares dhe për të gjithë ata që kanë dhënë kontribut në futbollin e Kosovës”, ka shkruar ai.