Presidenti i Federatës së Futbollit të Kosovës, Agim Ademi, ka pritur në takim përfaqësuesit e akademisë gjermane të futbollit “Train2Win”, Harald Cerny dhe Patrick Zimmerer, të shoqëruar nga bashkatdhetari Ndriqim Halili.

Sipas Ademit, përfaqësuesit e akademisë po qëndrojnë në Kosovë për të vëzhguar talentet e reja dhe zhvillimin e tyre, në kuadër të bashkëpunimit që “Train2Win” ka, veçanërisht me shkollën e futbollit FC Ramiz Sadiku.

Ai theksoi se Federata e Futbollit e Kosovës mbështet vazhdimisht iniciativa që nxisin zhvillimin e futbollit dhe bashkëpunimin me akademi e klube evropiane, duke vlerësuar rëndësinë e përfshirjes së bashkatdhetarëve në këto projekte.

Ademi u shpreh se ardhja e akademive prestigjioze në Kosovë krijon mundësi të reja për futbollistët e rinj, duke u hapur rrugën për zhvillim dhe karrierë në futbollin evropian.

Ai u uroi mirëseardhje mysafirëve nga Gjermania dhe shprehu bindjen se gjatë vizitës së tyre do të identifikohen talente që në të ardhmen do ta përfaqësojnë me krenari futbollin e Kosovës në klubet evropiane.