Presidenti i Federatës së Futbollit të Kosovës (FFK), Agim Ademi, ka reaguar me një mesazh prekës pas ceremonisë së lamtumirës për një nga figurat më të çmuara të futbollit kosovar, Erdogan Celina.

Ademi e ka vlerësuar të ndjerin si një futbollist ikonë, kapiten model, trajner dhe, mbi të gjitha, një njeri të madh, i cili gjatë gjithë jetës së tij ia kushtoi futbollit dhe la gjurmë të pashlyeshme në historinë e sportit kosovar.

Në postimin e tij, kreu i FFK-së ka kujtuar edhe mbledhjen komemorative të organizuar në nderim të Celinës, ku ai u përshkrua nga të gjithë si një futbollist dhe trajner shembullor, por mbi të gjitha si një njeri i jashtëzakonshëm, i dashur dhe i respektuar.

“Faleminderit për gjithçka që i dhe futbollit të Kosovës. Faleminderit për miqësinë dhe respektin që na dhurove. Lamtumirë, kapiten! Do të mbetesh përgjithmonë në kujtesën e futbollit tonë”, ka shkruar Ademi.

Erdogan Celina do të kujtohet si një nga emrat më të respektuar të futbollit të Kosovës, për kontributin e tij të çmuar si futbollist, kapiten dhe trajner, si dhe për personalitetin që gëzonte brenda dhe jashtë fushës së gjelbër.