Presidenti i Federatës së Futbollit të Kosovës, Agim Ademi, ka kujtuar me emocione legjendën e futbollit kosovar, Fadil Vokrri, në ditën e lindjes së tij, duke e cilësuar si një emër që nuk harrohet kurrë.

Në një postim në rrjetet sociale, Ademi vlerësoi kontributin e jashtëzakonshëm të Vokrrit si futbollist dhe si drejtues i FFK-së, duke theksuar se ai e shihte futbollin si një mision për ta ngritur emrin e Kosovës në arenën ndërkombëtare.

“Sot, në ditën e lindjes së tij, kujtojmë jo vetëm një futbollist të jashtëzakonshëm, por një figurë që mishëroi ëndrrën, krenarinë dhe rrugëtimin e futbollit të Kosovës”, shkroi Ademi.

Ai rikujtoi edhe bashkëpunimin me Vokrrin në periudhën kur Federata e Futbollit të Kosovës punonte për anëtarësimin në organizatat ndërkombëtare, duke theksuar se së bashku ndanë sfida, besim dhe të njëjtin qëllim – pranimin e futbollit të Kosovës në familjen botërore të futbollit.

Sipas Ademit, trashëgimia e Fadil Vokrrit nuk matet vetëm me sukseset sportive, por edhe me ndikimin që ai pati te brezat e rinj dhe te zhvillimi i futbollit në vend.

“Fadil Vokrri nuk është vetëm një kujtim. Ai është një frymëzim. Është pjesë e çdo hapi që bën futbolli ynë drejt së ardhmes. Përjetësisht Legjendë!”, përfundoi presidenti i FFK-së në postimin e tij.