Në prag të inaugurimit të FIFA Academy në Kosovë, presidenti i Federatës së Futbollit të Kosovës (FFK), Agim Ademi, ka pritur në takim përfaqësuesit e FIFA-s, Arnar Vidarsson, udhëheqës i Programit për Zhvillimin e Talenteve (TDS) të FIFA-s në Kosovë, dhe Tomas Danilevicius, konsulent teknik rajonal i FIFA-s.

Ademi ka bërë të ditur se gjatë takimit është diskutuar për rëndësinë e këtij projekti në zhvillimin e futbollit të të rinjve në Kosovë, si dhe për bashkëpunimin e vazhdueshëm ndërmjet FFK-së dhe FIFA-s në krijimin e mundësive të reja për talentet e rinj.

Inaugurimi i FIFA Academy do të mbahet sot, me fillim nga ora 16:30, në Kampin Nacional të FFK-së në Hajvali.

Sipas Ademit, hapja e kësaj akademie përbën një moment të veçantë dhe historik për futbollin kosovar, pasi akademia në Kosovë është e para e këtij lloji në rajon, e treta në Evropë dhe njëra prej vetëm 15 akademive të krijuara nga FIFA në mbarë botën.

“Ky fakt dëshmon besimin e FIFA-s në punën dhe vizionin tonë, por njëkohësisht na jep përgjegjësi edhe më të madhe për t’u krijuar gjeneratave të reja kushtet dhe mundësitë e nevojshme për ta zhvilluar talentin e tyre sipas standardeve më të avancuara ndërkombëtare”, ka shkruar Ademi.

Ai ka shprehur mirënjohje për FIFA-n për besimin, partneritetin dhe mbështetjen e vazhdueshme në zhvillimin e futbollit në Kosovë.