Presidenti i Federatës së Futbollit të Kosovës, Agim Ademi, ka bërë të ditur se në kuadër të Samitit të FIFA-s në Majami ka zhvilluar një takim me legjendën e futbollit botëror dhe drejtorin për Zhvillimin Global të Futbollit në FIFA, Arsène Wenger.

Sipas Ademit, gjatë takimit është diskutuar për zhvillimin e talenteve dhe futbollit, si dhe për organizimin e festivaleve për të rinjtë, djem dhe vajza, në kuadër të strategjisë së FIFA-s për zgjerimin e bazës së futbollit.

Presidenti i FFK-së ka bërë të ditur se Wenger ka vlerësuar potencialin e madh që ka Kosova në futboll, duke theksuar se rezultatet e Kombëtares së Kosovës dëshmojnë talentin dhe rrugën e duhur të zhvillimit që po ndjek futbolli kosovar.

Ademi ka rikujtuar se, duke u mbështetur në këtë potencial, FIFA tashmë ka hapur Akademinë e Talenteve në Kosovë, projekt që synon zhvillimin e gjeneratave të reja të futbollistëve.

Po ashtu, ai ka njoftuar se shumë shpejt Wenger, një nga trajnerët më të suksesshëm në historinë e futbollit, do ta vizitojë Kosovën për të përcjellë nga afër punën dhe zhvillimin e Akademisë së Talenteve.