Abdixhiku nga Malisheva: Më 9 shkurt do ta sjellim bashkë ndryshimin e madh për Kosovën

Kryetari i LDK-së, njëherësh kandidat për kryeministër, Lumir Abdixhiku ishte sonte në Malishevë për ta prezantuar “Turneun e Ndryshimit”.

Në një postim në Facebook, Abdixhiku ka falënderuar të gjithë pjesëmarrësit duke shkruar se më “9 shkurt do ta sjellin ndryshimin e madh për Kosovën”.

“Malisheva, sonte u bë pjesë e momentumit të madh të Lidhjes Demokratike! Turneu i Ndryshimit po na bën bashkë anekënd Kosovës në rrugëtimin tonë më të rëndësishëm – drejt ndryshimit që po ndërtojmë së bashku! Falënderoj përzemërsisht kryetarin e degës së LDK-së në Malishevë, Fatmir Ademaj dhe secilin prej jush që treguat se bashkimi dhe shpresa janë forca jonë më e madhe. Kjo është Kosova që duam të ndërtojmë së bashku – një Kosovë e mundësive dhe mirëqenies për të gjithë”.

“Në këtë tubim prezantuam edhe kandidatët tanë për Malishevë, që përveç Fatmir Ademajt, janë Fetah Rudi dhe Fatmir Kastrati të cilët do të jenë dhe pjesë e ekipit tonë fitues më 9 shkurt. Ata janë njerëz që përfaqësojnë qytetarët me dinjitet dhe me vendosmëri të madhe për ta sjellë ndryshimin e shumëpritur”.

“Me çdo ndalesë të Turneut të Ndryshimit, po bindemi se këto nuk janë tubime të zakonshme – janë themelet e një Lidhjeje që i përfaqëson ëndrrat dhe aspiratat e çdo qytetari të Kosovës. Prandaj, falemnderit që ju përgjigjet thirrjes sonë sonte në Malishevë! Më 9 shkurt do ta sjellim bashkë ndryshimin e madh për Kosovën! Më 9 shkurt – BËHU NDRYSHIMI!”, ka shkruar kreu i LDK-së.