Me datën 4 shtator 2026 në ambientet e Qendrës së Njësive Speciale “Enver Zymeri”, Policia e Kosovës mbajti ceremoninë e çertifikimit të 21 operatorëve të rinj të Drejtorisë së Njësive për Ndërhyrje të Shpejtë nga Policia e Kosovës. Këta operatorë kanë përfunduar me sukses të gjitha fazat e përzgjedhjes dhe përgatitjes, duke përfshirë edhe trajnimin bazik tetëjavor, gjatë të cilit pjesëmarrësit i janë nënshtruar një programi intensiv teorik dhe praktik, me fokus në përgatitjen profesionale, fizike dhe taktike, si dhe në zhvillimin e shkathtësive të nevojshme për reagim të shpejtë dhe veprim efektiv në situata të ndryshme operative.

Me këtë rast gjatë ceremonisë së mbajtur, çertifikatat për pjestarët e rinjë u shpërndanë nga Drejtori i Përgjithshëm i Policisë së Kosovës, Kolonel Gazmend Hoxha, i cili ndër të tjera përgëzoi operatorët për suksesin e arritur, duke vlerësuar lartë përkushtimin dhe angazhimin e tyre gjatë gjithë procesit, si dhe duke theksuar rëndësinë e disiplinës, profesionalizmit dhe përgjegjësisë në përmbushjen e detyrave policore.