Kryeprokurori i Shtetit, Zejnulla Gashi, ka pritur në takim Përfaqësuesin e Përhershëm të UNDP-së në Kosovë, Nuno Queiros, së bashku me bashkëpunëtorët e tij.

Gjatë takimit është diskutuar për avancimin e bashkëpunimit ndërmjet Zyrës së Kryeprokurorit të Shtetit dhe UNDP-së, veçanërisht në kuadër të projekteve të përbashkëta në luftën kundër korrupsionit dhe forcimin e sundimit të ligjit në Kosovë.

Një ndër çështjet e ngritura ishte edhe funksionalizimi sa më i shpejtë i platformës për hetime penale të bazuara në të dhëna inteligjente, e cila mbështetet nga UNDP-ja.

Sipas Kryeprokurorisë së Shtetit, kjo platformë pritet të shërbejë si një mekanizëm i rëndësishëm për zhvillimin e hetimeve financiare, përmes analizimit të mospërputhjeve të pasurisë dhe gjenerimit të të dhënave të bazuara në prova.

Këto të dhëna synohet të përdoren për ndjekjen më efektive të rasteve të korrupsionit, pastrimit të parave dhe krimit të organizuar.

Në fund të takimit, Kryeprokurori Gashi dhe përfaqësuesi i UNDP-së, Nuno Queiros, u pajtuan për vazhdimin e bashkëpunimit të ngushtë në fushat me interes të përbashkët.