Kryetari i Prishtinës, Përparim Rama, ka bërë të ditur se është diskutuar mundësia që Kompania Rajonale e Mbeturinave “Pastrimi” të shndërrohet nga kompani rajonale në kompani komunale.

Rama ka thënë se për këtë çështje ka diskutuar me kryetarin e Lipjanit, Imri Ahmetin, kryetarin e Drenasit, Ramiz Lladrovcin, dhe nënkryetaren e Kryeqytetit, Besianë Musmurati.

Sipas tij, kalimi në kompani komunale do të mundësonte menaxhim më efikas dhe më të shpejtë të shërbimeve të pastrimit.

“Aktualisht, në kompaninë regjionale ‘Pastrimi’ janë të përfshira Prishtina, Obiliqi, Lipjani, Fushë Kosova, Podujeva dhe Drenasi”, ka deklaruar Rama.

Ai ka thënë se synimi është që secila komunë ta ketë kompaninë, ekipin dhe menaxhimin e vet, duke mbajtur përgjegjësi të plotë për pastrimin e territorit të saj.

Rama bëri të ditur se Obiliqi dhe Fushë Kosova tashmë kanë nisur procedurat për këtë ndryshim, ndërsa me kryetarët e Lipjanit dhe Drenasit është diskutuar për vazhdimin e përbashkët të iniciativës.
“Kjo nuk është çështje politike. Është çështje e përgjegjësisë ndaj qytetarëve dhe e një shërbimi jetik që duhet të funksionojë çdo ditë”, ka theksuar Rama.

Ai ka paralajmëruar se në takimin e radhës pritet të marrin pjesë edhe kryetarët e komunave të tjera të përfshira në “Pastrimi”, me qëllim që të gjendet një zgjidhje e përbashkët për menaxhimin e shërbimeve të pastrimit.