Në Taranto të Italisë po mbahet Asambleja e Përgjithshme e Komitetit Ndërkombëtar të Lojërave Mesdhetare (ICMG), ku një pjesë e punimeve i është kushtuar edhe përgatitjeve për Lojërat Mesdhetare Prishtina 2030.

Gjatë Asamblesë, krahas zgjedhjes së presidentit dhe organeve të reja drejtuese të ICMG-së, do të prezantohet edhe progresi i bërë deri më tani për organizimin e Lojërave Mesdhetare në Prishtinë.

Prezantimin për progresin dhe punët që e presin Kosovën në kuadër të këtij organizimi do ta bëjë ministri për Sport dhe Rini, Blerim Gashani.

Në punimet e Asamblesë po marrin pjesë edhe drejtuesit e Komitetit Olimpik të Kosovës (KOK), përfshirë presidentin Ismet Krasniqi, sekretarin e përgjithshëm Besim Aliti dhe nënpresidentin Milaim Kelmendi.

Lojërat Mesdhetare Prishtina 2030 përbëjnë një nga ngjarjet më të rëndësishme sportive ndërkombëtare që do të organizohen në Kosovë.