Në qarkullim tri lloje të gripave, Sadiku: Në dy javët e para të janarit mbi 60 mijë vizita të pacientëve në QMF-të

Në dy javët e para të këtij viti mbi 60 mijë vizita të pacientëve me grip sezonal janë regjistruar në Qendrat e Mjekësisë Familjare (QKMF) në Komunën e Prishtinës. 

Kështu ka thënë në një prononcim për Telegrafin drejtori i Shëndetësisë në Komunën e Prishtinës, Izet Sadiku.

Sipas tij, edhe pse ka një rënie të vogël të fluksit të pacientëve në krahasim me dy javët e para të muajit janar, ende vërehet një numër i konsiderueshëm i pacientëve që kërkojnë shërbime në QMF-të e Prishtinës.

“Fatkeqësisht ende ka fluks të pacientëve, edhe pse tri – katër ditët e fundit është vërejtur një rënie e vogël e fluksit në krahasim me dy javët e para të janarit. Por, ende vazhdon të kenë kërkesa të shtuara të pacientëve që kanë infeksion nga gripet sezonale. Është vërtetuar që në Kosovë përveç gripit sezonal ka edhe COVID-19, edhe gripi i derrave (që quhet në popull)”, ka thënë Sadiku.

Siç u shpreh, ai për 15 ditët e para të këtij viti janë dhënë 200 mijë shërbime në krejt QMF-të.

“…Prej të cilave janë diku mbi 60 mijë vizita mjekësore, që është rreth 15 përqind më shumë se 15 ditët e dhjetorit të vitit të kaluar”, ka thënë Sadiku.

I pyetur se a ka staf mjekësor mjaftueshëm për ta përballuar gjithë këtë fluks të pacientëve, Sadiku tha: “Ju e dini që Prishtina fatkeqësisht ka numër të kufizuar të stafit, kjo është si pasojë e regjistrimit të numrit të popullsisë që ka ndodhur në vitin 2011 dhe sipas asaj Prishtina i ka 200 mijë banorë, e numri i mjekëve dhe infermierëve ndahet në bazë të numrit të banorëve. Dhe realisht ne e dimë që në Prishtinë është numër më i madh i banorëve, dhe shërbimet duhet me i dhënë për një numër më të madh të banorëve se që i kemi banorë rezidentë në kryeqytet. Kjo i mbingarkon punëtorët shëndetësorë”.

Drejtori i Shëndetësisë në Prishtinë u shpreh se: “sipas parametrave që ka përcaktuar Organizata e Punëtorëve të Shëndetësisë, një mjek familjar duhet t’i ketë diku mesatarisht 25 vizita mjekësore në ditë, e te ne shpesh kjo kalon 50-shin”.

Gjatë prononcimit, ai tregoi se edhe mjekët e stafi mjekësor janë kategori e rrezikuar nga përhapja e sëmundjeve virale.

“Edhe mjekët të cilët janë kategori e rrezikuar nga përhapja e sëmundjeve virale, pasi kanë kontakt vazhdimisht me pacientët e sëmurë, e kjo ndikon, që me u sëmurë edhe ata. Kemi pas edhe punëtorë shëndetësorë të sëmurë dhe sidomos në rast kur kemi pas COVID-19 është dashtë që ata të izolohen”.

“Tash kemi sëmundjet virale dhe sëmundjet virale domethënë nuk ka terapi të veçantë, është terapi simptomatike…”, tha ai.

Ndryshe, edhe Instituti Kombëtar i Shëndetësisë Publike të Kosovës (IKSHPK), kishte njoftuar se vetëm në javën e parë të janarit janë raportuar gjithsej 5 mijë e 713 raste të të prekurve me grip sezonal.

Sipas numrit të rasteve të raportuara për javën e parë të vitit 2024 numri i të prekurve me grip u paraqit në aktivitetin e lartë të qarkullimit, e cila shënoi rritje duke e kaluar pragun epidemik.