Shkëndija e Tetovës ka siguruar kualifikimin në raundin e tretë të Ligës së Konferencës, pasi mposhti Bravon me rezultat 3-1 në ndeshjen e kthimit, duke përmbysur humbjen 2-1 të pësuar një javë më parë në Slloveni.

Skuadra tetovare e nisi sfidën me një goditje të fortë, pasi pësoi gol në minutat e para të takimit dhe u gjend në një pozitë edhe më të vështirë në rezultatin e përgjithshëm.

Megjithatë, reagimi i kampionëve të Maqedonisë së Veriut ishte i jashtëzakonshëm. Shkëndija dominoi pjesën tjetër të ndeshjes, tregoi karakter dhe efikasitet në fazën sulmuese, duke realizuar tre gola që vulosën përmbysjen dhe kualifikimin në fazën e radhës të garës.

Me këtë fitore 3-1, Shkëndija jo vetëm që përmbysi disavantazhin nga ndeshja e parë, por edhe konfirmoi ambiciet për të vazhduar sa më gjatë rrugëtimin në arenën evropiane.

Tetovarët tashmë presin të mësojnë kundërshtarin e tyre në raundin e tretë kualifikues të UEFA Conference League, me synimin për të qenë sa më pranë fazës “play-off” të kompeticionit.