Presidenti i Federatës së Futbollit të Kosovës (FFK), Agim Ademi, ka njoftuar se është takuar me legjendën e FIFA-s dhe të futbollit kroat, Davor Shukerin, gjatë qëndrimit në New York.

Përmes një postimi në ‘Facebook’, Ademi bëri të ditur se takimi u zhvillua në FIFA Fan Club, pak çaste para nisjes për drekën zyrtare në Trump Tower, ku, siç theksoi ai, ishin të ftuar.

Ademi e cilësoi Shukerin si një mik të madh të futbollit të Kosovës, duke vlerësuar rëndësinë e këtyre takimeve për forcimin e bashkëpunimit ndërkombëtar në futboll.

“Futbolli vazhdon të ndërtojë ura miqësie, respekti dhe bashkëpunimi në mbarë botën”, ka shkruar presidenti i FFK-së.