Federata e Gjimnastikës së Kosovës mori pjesë në Kampin Europian të Gjimnastikës Ritmike, të mbajtur nga 17-22 qershor 2025 në Budva, Mali i Zi.

Përfaqësuesit e Kosovës në këtë kamp ishin trajnerja Fiona Konxheli dhe gjimnastet Jumna Reka, Anarita Mihilli, Luna Dullovi dhe Ela Lahaj, të gjitha nga Klubi i Gjimnastikës Ritmike “Ritmiks”.

Gjatë kampit, pjesëmarrëset patën mundësinë të stërviten dhe të mësojnë nga ekspertë të njohur ndërkombëtarë, duke zhvilluar sesione të përgatitjes fizike, punës me elementet trupore dhe veglat, krijimit të kompozimeve, baletit dhe vallëzimit, si dhe të marrin pjesë në seminarin mbi rehabilitimin fizik dhe parandalimin e lëndimeve.

Programi u pasurua gjithashtu me aktivitete kulturore dhe vizita turistike.

Pjesëmarrja në këtë kamp ishte një mundësi e vlefshme për avancimin profesional të trajneres dhe zhvillimin teknik e artistik të gjimnasteve, duke u ofruar atyre përvoja të reja, njohuri bashkëkohore dhe frymëzim për punën e tyre të mëtejshme.

Federata e Gjimnastikës së Kosovës mbetet e përkushtuar në krijimin e mundësive për zhvillimin e sportistëve dhe trajnerëve tanë përmes pjesëmarrjes në aktivitete ndërkombëtare, duke investuar në ngritjen e cilësisë së gjimnastikës në Kosovë.