Kurti i mbledh drejtuesit e qendrave, flasin për zgjedhjet lokale 

Sot, në zyrën qendrore të LVV-së u mbajt mbledhja e përbashkët me drejtuesit e qendrave të Lëvizjes Vetëvendosje në Kosovë.

I pranishëm në mbledhje ishte kryeministri në detyrë, njëherazi kryetar i LV-së, Albin Kurti, sekretari organizativ Alim Rama dhe koordinatori i qendrave, Salih Zyba.

Albin Kurti foli për situatën aktuale politike në vend, për bllokimin që opozita po ia bën Kuvendit të Kosovës përmes mospjesëmarrjes në votim, si dhe për vijueshmërinë e punëve të Qeverisë, e cila është në detyrë dhe po kryen punën për qytetarët e saj, në shërbim të tyre.

Në diskutim u theksua rëndësia e përgatitjes sa më të hershme për zgjedhjet lokale, me theks të veçantë në mobilizimin e strukturave organizative në terren dhe angazhimin e vazhdueshëm me qytetarët.

Një nga temat kryesore të takimit ishte edhe Java e Lëvizjes, ngjarje tashmë tradicionale e organizatës sonë, që fillon më 10 qershor me Lidhjen e Prizrenit e përfundon më 17 qershor me datëlindjen e intelektualit dhe profesorit Ukshin Hoti.

Këtë vit, po ashtu, data 12 qershor përveç ditës së çlirimit, shënon 20-vjetorin e Lëvizjes sonë, Lëvizjes së popullit.

Përgatitjet për aktivitetet që shënojnë këtë javë tashmë kanë nisur në të gjitha nivelet organizative.

Strukturat tona organizative, gjithandej lagjeve e fshatrave, janë të gatshme për procesin e zgjedhjeve lokale, për qeverisjen e mirë lokale që i duhet komunave, lagjeve e fshatrave.