Ramadani: Javën tjetër me gjasë zhbllokohet Kuvendi, s’ka Qeveri Kurti 3

Deputetët e Kuvendit të Kosovës nuk kanë arritur ta konstituojnë as pas tentimit të shtatë radhazi, pasi kandidatja e Lëvizjes Vetëvendosje për kryetare të Kuvendit nuk mori votat e nevojshme as në seancën e së dielës.

Në këtë situatë të bllokuar politike, analisti Burim Ramadani ka deklaruar se javën e ardhshme pritet të zhbllokohet konstituimi i Kuvendit, duke lënë të kuptohet se është arritur një zgjidhje e ndërmjetme.

Përmes një postimi në Facebook, ai ka paralajmëruar se pas konstituimit të Kuvendit, sfida tjetër do të jetë formimi i Qeverisë së re. Megjithatë, Ramadani ka theksuar se, sipas tij, nuk ekziston mundësia për formimin e një Qeverie “Kurti 3”.

“Në javën e ardhshme me gjasë zhbllokohet konstituimi i Kuvendit, përmes një solucioni të ndërmjetëm. Pastaj fillon pjesa e dytë e ballafaqimit politik: formimi i Qeverisë së re!
P.S. Nuk ka Qeveri Kurti3!”, ka shkruar ai.