Krasniqi takon ambasadorin e BE-së: Zgjedhjet, moment i rendësishëm

Kryetari i PDK-së, Memli Krasniqi, ka pritur në takim ambasadorin e Bashkimit Evropian në Kosovë, Aivo Orav.

Bashkë me të diskutuan për zhvillimet e fundit politike në vend, me fokus të veçantë te procesi zgjedhor dhe rëndësia e përmbylljes së tij në përputhje me standardet më të larta demokratike.

“Për Partinë Demokratike të Kosovës, këto zgjedhje përfaqësojnë një moment të rëndësishëm për demokracinë tonë dhe një dëshmi e qartë e pjekurisë politike të qytetarëve të Kosovës. Në PDK, ne respektojmë dhe njohim vullnetin e qytetarëve të shprehur përmes votës. Urojmë që vendi të ketë sa më shpejt një qeveri të re funksionale, e cila do të adresojë sfidat dhe prioritetet shtetërore me përgjegjësi dhe dinjitet”, ka thënë Krasniqi.

Ai ka shtuar se PDK-ja mbetet e përkushtuar ndaj një të ardhmeje më të mirë për Kosovën, pavarësisht pozicionit të saj politik.

“Ne jemi të bindur se vetëm përmes bashkëpunimit dhe një qasjeje konstruktive, vendi ynë do të vijojë rrugën e konsolidimit demokratik dhe integrimit euro-atlantik”, ka theksuar Krasniqi.