Kryeministri në detyrë, Albin Kurti, ka deklaruar se Qeveria e Kosovës do të vazhdojë të zgjerojë mbështetjen për gratë ndërmarrëse, bizneset, inovacionin dhe digjitalizimin, duke theksuar se barazia është rruga e vetme drejt progresit.

Këto komente ai i bëri në konferencën e parë “Gratë në Biznes – She Rises 2026”, ku morën pjesë rreth 300 gra nga fusha e ndërmarrësisë, institucionet dhe organizatat vendore e ndërkombëtare.

Kurti tha se mbështetja për gratë nuk do të mbetet vetëm në nivel deklarativ, por do të konkretizohet përmes programeve të dedikuara, subvencioneve të drejtpërdrejta dhe lehtësimit të qasjes në financa.

Ai njoftoi gjithashtu se do të themelohet Divizioni për Gratë Ndërmarrëse në agjencinë që po krijohet nga Ministria e Industrisë, Ndërmarrësisë, Tregtisë dhe Inovacionit.

Sipas tij, në kuadër të masave për punësim dhe zhvillim ekonomik, do të nisë edhe programi “Superpuna për Gratë”, i cili do të garantojë pagën minimale për gjashtë muaj për gratë që hyjnë ose rikthehen në tregun e punës.

Ai theksoi se ky program synon të krijojë përfitime si për punëmarrëset, ashtu edhe për bizneset.