Kryetarja e Kuvendit të Kosovës, Albulena Haxhiu, me rastin e Ditës Ndërkombëtare të Shërbyesve Civilë, organizoi një takim me stafin administrativ të institucionit, në shenjë vlerësimi për kontributin e tyre në funksionimin dhe avancimin e punës së Kuvendit.

Gjatë takimit, kryetarja Haxhiu shprehu mirënjohje për përkushtimin, profesionalizmin dhe angazhimin e vazhdueshëm të shërbyesve civilë, të cilët me punën e tyre të përditshme japin një kontribut të rëndësishëm në realizimin e përgjegjësive kushtetuese dhe ligjore të Kuvendit.

“Shpreh mirënjohjen dhe vlerësimin tim për punën, përkushtimin, profesionalizmin dhe kontributin e përditshëm të shërbyesve civilë, të cilët janë garancia për funksionimin efikas të institucionit më të lartë përfaqësues e ligjvënës në vendin tonë”, theksoi Haxhiu.

Haxhiu falënderoi të gjithë punëtorët e administratës së Kuvendit për kontributin e tyre të çmuar në forcimin e institucioneve demokratike dhe në shërbim të interesit publik, duke u uruar suksese të mëtejshme në përmbushjen e detyrave të tyre profesionale.