Presidenti i Federatës së Futbollit të Kosovës, Agim Ademi, ka uruar qytetarët me rastin e Ditës së Çlirimit të Kosovës, duke nderuar sakrificën e të gjithë atyre që kontribuuan për lirinë dhe shtetndërtimin e vendit.

Në mesazhin e tij, Ademi ka shprehur respekt për veprimtarët dhe aktivistët e çështjes kombëtare, duke theksuar se përkushtimi dhe sakrifica e tyre e mbajtën gjallë idealin e lirisë ndër dekada.

Ai ka bërë homazhe për familjen e Komandantit Adem Jashari, ushtarët e UÇK-së dhe të gjithë dëshmorët që dhanë jetën për lirinë e Kosovës, ndërsa ka vlerësuar lart edhe kontributin e Shteteve të Bashkuara të Amerikës, vendeve aleate dhe NATO në çlirimin e vendit.

Postimi i tij:

🇽🇰 Urime Dita e Çlirimit

Sot shënojmë me krenari Ditën e Çlirimit të Kosovës, duke nderuar të gjithë ata që, ndër dekada, kontribuuan për lirinë dhe shtetndërtimin e vendit tonë.

Me respekt kujtojmë veprimtarët dhe aktivistët e çështjes kombëtare, të cilët me përkushtimin, sakrificën dhe qëndresën e tyre mbajtën gjallë idealin e lirisë ndër dekada.

Përulemi me mirënjohje para heroizmit të familjes së Komandantit Adem Jashari, ushtarëve të UÇK-së dhe të gjithë dëshmorëve që dhanë jetën për Kosovën e lirë, e po ashtu vlerësojmë lart kontributin e SHBA-së dhe shteteve aletate dhe të NATO-s në çlirimin e vendit tonë.

Në ato vite të vështira, shumë futbollistë lanë fushat e blerta dhe iu bashkuan luftës çlirimtare, duke vënë mbi gjithçka dashurinë për atdheun dhe lirinë.

Në këtë ditë, urojmë që krerët e UÇK-së që po përballen me procesin gjyqësor në Hagë ta kenë një verdikt të drejtë dhe sa më shpejt të kthehen pranë familjeve në atdheun e tyre.

Liria që gëzojmë sot është amaneti më i çmuar që na obligon ta ruajmë dhe ta forcojmë çdo ditë.

Lavdi të rënëve për liri dhe mirënjohje e përhershme për të gjithë ata që kontribuuan në rrugëtimin e Kosovës drejt lirisë dhe pavarësisë. 🇽🇰