Ramadani: Mund të bëjmë surprizën në Evropian

Mesfushori i kombëtares shqiptare të futbollit, Ylber Ramadani është përshtatur më së miri te Lecce që në sezonin e tij të parë.

Së fundmi, në një intervistë të dhënë për mediet italiane, mesfushori shqiptar theksoi se tifozët e Lecce-s e kanë pritur në mënyrë të shkëlqyer.

“Unë dhe familja ime jemi vendosur mirë, skuadra më priti në një mënyrë të shkëlqyer. Unë nuk ndihem si lider, ka shumë liderë në dhomën tonë të zhveshjes. Është e qartë, megjithatë, ky rol kërkon një personalitet të madh. Ndihem mirë. Mesfushori qendror është një pozicion që më pëlqen dhe duhet ta pranoj se D’Aversa më ndihmoi shumë.

Ai më shpjegoi se çfarë dëshiron nga unë dhe në cilat aspekte mund të përmirësohem. Unë zura vendin e një lojtari si Hjulmand, i cili ishte i preferuari i tifozëve vitin e kaluar, por është edhe falë mbështetjes së tyre që pata një paraqitje të rëndësishme. Mbështetja e tyre më shtyu, ditë pas dite, të jap gjithçka.

Jemi në një grup shumë të komplikuar, por ne mund të jemi surpriza. Skuadra jonë është një grup që mund të bëjë shumë mirë, shumë prej nesh luajnë në ligat kryesore evropiane edhe djemtë e rinj mund të bëjnë gjithashtu shumë mirë. Do të jetë një aventurë e madhe”, deklaroi Ylber Ramadani.