Kryetari i Partisë Demokratike të Kosovës dhe kandidati për kryeministër, Bedri Hamza tha se ekonomia e Kosovës ndërtohet mbi punën, guximin dhe investimet e sektorit privat, duke theksuar se bizneset kanë nevojë për një qeveri që i mbështet dhe jo që u krijon pengesa.
“Puna e ndërmarrësve dhe punëtorëve shihet më së miri kur jemi pranë tyre. Në qeverisjen time, bizneset do të kenë më pak tatime, grante deri në 30% dhe më shumë hapësirë për zhvillim. Kosova ndryshon kur mbështeten ata që punojnë”, ka shkruar Hamza.
Ai rikujtoi se Programi i PDK-së parasheh një sërë masash konkrete për sektorin privat, duke përfshirë subvencione dhe grante që mbulojnë deri në 30 për qind të investimeve për sektorët prodhues dhe inovativë, zgjerimin e Fondit të Garantimit të Kredive, si dhe krijimin e instrumenteve të reja financiare për bizneset e reja dhe startup-et.
Gjithashtu, bizneset me qarkullim vjetor deri në 10 mijë euro do të lirohen nga tatimi, ndërsa ato me qarkullim deri në 30 mijë euro do të tatohen vetëm mbi fitimin real.
Sipas Hamzës, një nga pengesat kryesore për bizneset do të adresohet përmes ndryshimit të mënyrës së pagesës së TVSH-së, duke e transferuar atë nga kufiri në momentin e shitjes së produktit, masë që do të përmirësojë likuiditetin, do të ulë presionin financiar dhe do të krijojë kushte më të favorshme për investime dhe punësim.
PDK vlerëson se zhvillimi ekonomik, rritja e pagave dhe hapja e vendeve të reja të punës janë rruga më e sigurt për t’i dhënë fund krizës ekonomike dhe për të kthyer besimin e qytetarëve në të ardhmen e vendit.