Në ambientet e rektoratit u mbajt takimi i grupit punues për zhvillimin e Planit Strategjik të Universitetit të Prishtinës 2026-2030.

Ky plan, njëri nga instrumentet më të rëndësishme të funksionimit të UP-së përballë sfidave të zhvillimeve të hovshme teknologjike dhe epokës së inteligjencës artificiale, synon një universitet inovativ, bashkëkohor dhe të integruar në grupin e universiteteve më të zhvilluara.

Ai, në mesin e objektivave të përcaktuara qartë, e ka në qendër studentin dhe performancën institucionale.

Takimi i sotëm i grupit punues ishte i njëmbëdhjeti me radhë, ndërsa për përpilimin e Planit të ri Strategjik të UP-së, janë përfshirë të gjithë akterët relavantë si: anëtarët e Këshillit Drejtues, prorektorët, dekanët, studentët, personeli akademik dhe ai i administratës.

Ky plan pritet të miratohet nga Këshilli Drejtues në qershor të vitit 2026. Grupi punues i kryesuar nga prof. Mimoza Ibrani, anëtare e Këshillit Drejtues, ka pasur takime të rregullta konsultative duke filluar me vlerësimin e zbatimit të Planit Strategjik 2023-2025, marrjen e inputeve nga të gjithë akterët relevantë, përfshirjen aktive të studentëve, e deri në takimin final të prezantimit të objektivave, aktiviteteve dhe indikatorëve kyç të performancës.

Plani Strategjik i UP-së do të përcillet me Planin e Veprimit, i cili do të jetë i bazuar në prioritetet strategjike.

Puna e grupit punues që zhvilloi Planin Strategjik të UP-së 2026-2030, u mbështet nga Programi ShER, Arsimi i Lartë dhe Kërkimi i Qëndrueshëm në Kosovë.