Vit i madh për artin e sportin

“Vit i madh për artin e sportin. U rikthye festivali i këngës në RTK, Kosova shpallet nikoqire e Lojërave Mesdhetare 2030, zbulim sensacional në Ulpianën dardane, Kosova anëtarësohet në asociacionin për të rinjtë EYC”, ka shkruar MKRS në faqen e saj zyrtare në Facebook.

🔹 Reformë e thellë ligjore në kulturë, sport e rini. Shumë ligje e akte të miratuara për të fuqizuar artistin e sportistin në karrierë dhe mirëqenie ekonomike. Kinematografinë e shpallëm sektor të interesit të veçantë publik, ndërsa rininë po e bëjmë me agjenci e strategji shtetërore.

🔹Për më shumë art e sport në shkollat tona kemi lansuar programet “Arti në shkolla”, “Sporti në shkolla” dhe “Vullnetarizmi në shkolla”. Mijëra nxënës në dhjetëra komuna e shkolla përfitues të aktiviteteve në teatër, muzikë, muzeologji, xhudo, skijim e hiking.

🔹Mbështetja direkte për kulturën, rininë e sportin, si asnjëherë më parë, sivjet arriti vlerën 18 milionë euro. Mbështetëm federatat, klubet e sportistët, artistët e organizatat kulturore, shkrimtarët e shtëpitë botuese, studentët e aktivistët e rinisë.

🔹Sivjet themeluam Muzeun e Artit Bashkëkohor, koncepti dhe programi i të cilit është hartuar nga artistë e kuratorë të shquar vendorë. Pas edicionit të suksesshëm të Manifesta 14, vazhdojmë të fuqizojmë artin bashkëkohor dhe lidhjet tona me artin në botë.

🔹 Edhe ky vit kishte dinamikë të lartë të restaurimit të monumenteve. Dhjetëra ndërhyrje edhe sivjet, në gjithë vendin, në të gjitha kategoritë e trashëgimisë kulturore. Për vetëm dy vjet kemi restauruar më shumë se në dekadën 2010- 2020.

🔹 Arkeologjia me vëmendje të veçantë në vitin e zbulimit të madh, mbishkrimi i Perandorit Justinian për qytetin dardan të Ulpianës. Dy shpronësime të shumëpritura në Ulpianë dhe Dresnik, trajtimi dhe rehabilitimi i lokaliteteve, planet e menaxhimit dhe buxhet i rritur për arkeologjinë.

🔹 Kosova ka fituar statusin e shtetit nikoqir të Lojërave Mesdhetare 2030. Investojmë 250 milionë euro për ngjarjen më të madhe multi-sportive në historinë e vendit tonë. Gjithashtu, këtë vit Kosova ishte nikoqe e kampionatit evropian të xhudos “European Championships Open”.

🔹 Kemi nisur zbatimin e planit pesë vjeçar për infrastrukturën e futbollit. Pesë vite, 16 komuna, 25 stadiume anekënd Kosovës, me rreth 200 milionë euro investime. Kemi zgjidhur bllokada shumë vjeçare në stadiumet e Mitrovicës dhe Gjilanit, ndërsa së shpejti merret vendimi për lokacionin e stadiumit nacional.

🔹 Kosova u anëtarësua në organizatën ndërkombëtare Shoqata Evropiane e Kartës Rinore (European Youth Card Association), partner institucional i Këshillit të Evropës. Përfitime të mëdha për të rinjtë tanë si në Kosovë ashtu edhe në 30 shtete evropiane ku vlen karta.

🔹 Në përmbyllje hartimi i projekteve, ndërsa vitin e ardhshëm nisim renovimet në Teatrin Kombëtar, Bibliotekën Kombëtare, Galerinë Kombëtare dhe Muzeun Kombëtar. Edhe sivjet vazhduam punën në përmirësimin e infrastrukturës kulturore në shumë zona.