Organizata e Veteranëve të Luftës së UÇK-së ka bërë thirrje publike për mobilizim dhe pjesëmarrje qytetare në Skenderaj, pranë stacionit të Policisë, ku pritet të intervistohet gjenerali Sami Lushtaku.

Përmes një reagimi, OVL e UÇK-së ka ftuar veteranët dhe të gjithë qytetarët që, siç thuhet, ndjejnë respekt për luftën çlirimtare, të bashkohen në mënyrë të qetë dhe dinjitoze në mbështetje të ish-luftëtarëve të UÇK-së.

Reagimi i plotë:

Thirrje publike

Organizata e Veteranëve të Luftës së UÇK-së fton të gjithë veteranët dhe qytetarët që ndjejnë respekt për luftën çlirimtare, që të nisen drejt Skenderajt dhe të bashkohen pranë stacionit të Policisë, ku pritet të intervistohet gjenerali Sami Lushtaku.

Sot më shumë se kurrë, kërkohet unitet, dinjitet dhe përkrahje për ata që i dolën zot Atdheut në ditët më të vështira të historisë sonë. Prania jonë është mesazh se lufta çlirimtare e UÇK-së ishte e drejtë dhe se luftëtarët e saj nuk do të jenë kurrë vetëm.

Ftojmë të gjithë që pjesëmarrja të jetë e qetë, dinjitoze dhe në frymën e respektit qytetar, ashtu siç e meriton historia e luftës sonë çlirimtare.