Theo Hernandez po mendon seriozisht rikthimin në Serie A vetëm një vit pasi u transferua te Al-Hilal në Arabinë Saudite. Sipas raportimeve nga Italia, mbrojtësi francez po monitorohet nga Juventusi, por edhe nga ish-klubi i tij, Milani.

26-vjeçari ka zhvilluar një sezon pozitiv nën drejtimin e Simone Inzaghit te Al-Hilal, ku ka regjistruar nëntë gola dhe pesë asistime në 42 paraqitje, madje duke shënuar edhe në finalen e King’s Cup. Megjithatë, Theo nuk e ka fshehur dëshirën për t’u rikthyer në futbollin evropian.

Juventusi raportohet se e sheh Theo Hernandez si përforcim ideal për krahun e majtë, ndërsa te Milani vazhdon të ekzistojë ideja e një rikthimi emocional të francezit, edhe pse marrëdhënia mes palëve nuk u mbyll në mënyrën më të mirë verën e kaluar, raporton kk.

Sipas “CalcioMercato”, pengesa kryesore mbetet paga e tij aktuale prej rreth 20 milionë euro neto në sezon, të cilën klubet italiane nuk mund ta përballojnë. Megjithatë, raporti shton se lojtari tashmë ka përmbushur kushtet fiskale në Arabinë Saudite dhe mund të negociojë rikthimin në Evropë pa probleme shtesë tatimore.