Irani mohon pretendimin e ShBA-së se ka shënjestruar një cisternë afër Indisë

Irani mohoi të hënën një pretendim të Shteteve të Bashkuara të Amerikës se një dron i nisur nga Irani kishte goditur një cisternë kimike në oqeanin Indian.

Pentagoni tha në fundjavë se anija Chem Pluto me flamur të Liberisë, në pronësi japoneze dhe të operuar nga Hollanda u godit 200 milje detare larg brigjeve të Indisë, raporton Reuters, transmeton Klankosova.tv.

“Këto akuza të përsëritura refuzohen si të pabaza”, tha zëdhënësi i ministrisë së Jashtme të Iranit, Nasser Kanaani në një konferencë, duke shtuar se ShBA-ja duhet të përballet me akuza për rolin e saj në luftën e Izraelit në Gaza.

Marina iraniane ka marrë në dorëzim raketa lundrimi me rreze veprimi prej 1 mijë km si dhe helikopterë zbulimi, raportoi media shtetërore të dielën, në mes të sulmeve në rritje në korsitë e anijeve pas sulmit të 7 tetorit të Hamasit në Izrael dhe bombardimet e mëvonshme të Gazës nga Izraeli.