Kryeministri në detyrë i Kosovës, Albin Kurti, i shoqëruar nga ministrja në detyrë e Industrisë, Ndërmarrësisë, Tregtisë dhe Inovacionit, Mimoza Kusari Lila, dhe kryetari i komunës së Mitrovicës, Faton Peci, mori pjesë në vënien e gurthemelit të Parkut Industrial në fshatin Frashër.

Kryeministri në detyrë Kurti tha se në këtë park industrial do të mund të vendosen bizneset e ndryshme nga Mitrovica dhe mbarë Kosova, por edhe investitorë të huaj, ashtu që të rritet prodhimtaria e të shtohet punësimi.

Teksa ftoi edhe bizneset nga mërgata që të investojnë, ai tha se sa më shumë që bizneset prodhojnë, aq më shumë krijohen kushtet për rritje të eksporteve dhe për zëvendësim të importeve, për përmirësim të bilancit tregtar dhe për përparim të gjithëmbarshëm socio-ekonomik.

Vlera e investimit është afër një milion euro, ndërsa punimet për ndërtimin e Parkut Industrial parashihet të zgjasin 150 ditë.