Një ndeshje dramatike është luajtur në “Stadio Diego Armando Maradona”, ku Napoli nuk ka arritur të shfrytëzojë avantazhin në shtëpi dhe është mundur 3-2 nga Bologna, duke vënë në pikëpyetje kualifikimin e tij në Champions League.

Napoli e nisi ndeshjen me objektiv të qartë sigurimin matematikisht të vendit në top katërshe, por mungesat e shumta u bënë pengesë, raporton Klankosova.tv.

Kevin De Bruyne mbeti jashtë pas një lëndimi në stërvitje, ndërsa nuk luajtën as Romelu Lukaku dhe David Neres.

Bologna e nisi më fuqishëm takimin, duke kaluar në avantazh me golin e Juan Miranda, pas një kombinimi të bukur me Federico Bernardeschi.

Pak minuta më vonë, mysafirët fituan një penallti pas ndërhyrjes së Giovanni Di Lorenzo ndaj Mirandas, ndërsa Riccardo Orsolini shënoi për 2-0, duke tronditur stadiumin e Napolit.

Napoli reagoi para pushimit, kur Di Lorenzo shënoi për 2-1, duke u rikthyer në fushë pas një mungese tre-mujore për shkak dëmtimi.

Në pjesën e dytë, Alisson Santos barazoi rezultatin në 2-2 me një goditje të saktë në cepin e portës, duke dhënë shpresë për kthim të plotë të Napolit.

Megjithatë, kur gjithçka dukej se do të mbyllej me barazim, Bologna realizoi një moment spektakolar.

Portieri Vanja Milinkovic-Savic ndali fillimisht goditjen e Mirandas, por topi përfundoi te Jonathan Rowe, i cili realizoi me një vole akrobatike për fitoren 3-2 të mysafirëve, duke shkaktuar entuziazëm te tifozët e tij dhe zhgënjim te stadiumi i Napolit.

Pas kësaj humbjeje, Napoli ka 70 pikë, me vetëm dy xhiro të mbetur deri në fundin e sezonit, ndërsa pas tij ndodhet Juventusi me 68 pikë.

Milani dhe Roma ndajnë vendin e katërt me nga 67 pikë, duke lënë garën për top katërshe të hapur dhe emocionuese deri në xhiron e fundit.