Ministria e Arsimit dhe Shkencës, ka hartuar Kornizën Kombëtare të Cilësisë për Edukimin në Fëmijërinë e Hershme (EFH), dokument ky që strukturon deklaratat dhe indikatorët e cilësisë rreth pesë fushave themelore që udhëheqin zhvillimin, mbikëqyrjen dhe vlerësimin e sektorit në EFH.

Këto fusha janë të harmonizuara me fushat me prioritet të përcaktuara në Kornizën Evropiane të Cilësisë për Edukimin në Fëmijërinë e Hershme (EFH), si dhe me mjedisin kombëtar të politikave dhe legjislacionit për Edukimin në Fëmijërinë e Hershme në Kosovë dhe prioritetet e tij, përkatësisht: Udhëheqja dhe Financimi, Qasja, Stafi, Kurrikula dhe Pedagogjia, si dhe Monitorimi dhe Vlerësimi.

Me këtë rast, zëvendësministri në detyrë i Arsimit dhe Shkencës, Përparim Kryeziu, nënvizoi se reforma në edukimin në fëmijërinë e hershme përfaqëson një nga proceset më të rëndësishme zhvillimore në arsim, me qëllim sigurimin e qasjes në edukim cilësor, të sigurt dhe gjithëpërfshirës për secilin fëmijë në Kosovë.

“Kjo reformë një qëllim të qartë dhe të përbashkët: që çdo fëmijë në Kosovë të ketë qasje në edukim të hershëm cilësor, të sigurt dhe gjithëpërfshirës. Sepse aty fillon gjithçka – aty ndërtohet themeli i një shoqërie më të fortë dhe më të barabartë”, tha zv/ministri Kryeziu

Drejtoresha e Arsimit Parauniversitar, Anita Kadriu, në fjalën e hapjes theksoi se, ky proces është kërkesë për Kosovën në Agjendën e Refomave të Bashkimit Europian, i cili shpërblehet nga BE-ja, perveç në kuptim të reformës po ashtu edhe në aspektin financiar për zhvillimin e këtij niveli edukimi.

Ndërsa dokumentin e prezantoi udhëheqësja e Divizionit për Edukimin në Fëmijërinë e Hershme, Labëri Luzha, ku të pranishëm ishin përfaqësues nga MASH, Instituti Pedagogjik i Kosovës, Drejtoritë Komunale të Arsimit dhe UNICEF-i.

Gjatë punëtorisë u theksua rëndësia e forcimit të cilësisë në edukimin në fëmijërinë e hershme përmes Kornizës për Sigurimin e Cilësisë dhe instrumenteve përkatëse të vlerësimit, si dhe fillimi i procesit të vetëvlerësimit në rreth 160 institucione parashkollore në nivel vendi.