Presidenti Ademi dhe kryetari i komunës së Leposaviqit nënshkruajnë Memorandumin e Bashkëpunimit

Presidenti i Federatës së Futbollit të Kosovës, Agim Ademi dhe humanisti Halil Kastrati, së bashku me bashkëpunëtorë, kanë qëndruar në Leposaviq, ku u pritën nga kryetari i kësaj komune, Lulzim Hetemi.

Në një atmosferë të ngrohtë e miqësore, presidenti Ademi dhe kryetari Hetemi nënshkruajtën Memorandumin e Bashkëpunimit, i cili parasheh rregullimin e kompleksit sportiv dhe fushës së futbollit në këtë komunë.

Kjo iniciativë shënon një hap të rëndësishëm drejt promovimit të sportit dhe aktiviteteve të ndryshme shoqërore në këtë komunë, e cila për shumë vjet nuk ka pasur investime në sport.

Presidenti Ademi ritheksoi edhe një herë se FFK i ka dyert e hapura për regjistrimin në gara për të gjitha klubet në të gjithë territorin e Republikës, duke përfshirë edhe ato nga Leposaviqi ku u nënshkrua memorandumi.

Ndërkaq, humanisti i njohur Halil Kastrati sigurisht do të bëjë mrekulli edhe në komunën e Leposaviqit me projekte, siç ka bërë edhe në të gjitha komunat e Kosovës e  më gjerë.

Bashkëpunimi mes autoriteteve lokale dhe FFK-së është thelbësor për zhvillimin dhe përparimin e komunitetit të futbollit, andaj nënshkrimi i Memorandumit të Bashkëpunimit do të sjellë fryte për të rinjtë e kësaj treve, duke nxitur bashkëjetesën në paqe përmes sportit.