Zëvendësguvernatori i Bankës Qendrore të Republikës së Kosovës (BQK), Dardan Fusha, mori pjesë në Konferencën e 8-të Ndërkombëtare të Skemave Rajonale të Kartelave dhe Infrastrukturave të Tregut Financiar për Pagesat me Vlerë të Vogël, të organizuar në Tiranë nga Shoqata Evropiane e Pagesave me Kartela (ECPA) dhe Grupi i Bankës Botërore, me Bankën e Shqipërisë si nikoqire.
Konferenca, me temën “Pagesa globale të shpejta, të qasshme, të ndërveprueshme dhe të qëndrueshme”, mblodhi përfaqësues të bankave qendrore, institucioneve financiare ndërkombëtare dhe industrisë së pagesave. Në programin e saj u përfshinë adresimet e Guvernatorit të Bankës së Shqipërisë, z. Gent Sejko, anëtarit të Bordit Ekzekutiv të Bankës Qendrore Evropiane, z. Piero Cipollone, mbi të ardhmen e parasë dhe pagesave, si dhe drejtoreshës së Bankës Botërore për Ballkanin Perëndimor, znj. Xiaoqing Yu, mbi rolin e pagesave digjitale në inovacionin dhe integrimin rajonal.
Zëvendësguvernatori Fusha kontribuoi në panelin “Pagesat e shpejta në Ballkanin Perëndimor”, së bashku me zëvendësguvernatorët e bankave qendrore të Shqipërisë, Maqedonisë së Veriut dhe Bosnjës e Hercegovinës, të moderuar nga përfaqësuesi i Bankës Botërore në Shqipëri, z. Massimiliano Paolucci.
Në diskutim, z. Fusha theksoi se modernizimi i pagesave në Kosovë mbështetet në tri shtylla kryesore modernizimin e infrastrukturës, integrimin evropian dhe nxitjen e konkurrencës e inovacionit. Ai nënvizoi se sistemi i pagesave të shpejta TIPS Clone dhe procesi i anëtarësimit në SEPA janë iniciativa komplementare, që synojnë pagesa më të shpejta, më të sigurta, më të lehta dhe me kosto më të përballueshme për qytetarët dhe bizneset.
Vëmendje e veçantë iu kushtua bashkëpunimit rajonal për standarde dhe rregulla të harmonizuara, si bazë për ndërveprueshmërinë dhe zhvillimin e ardhshëm të pagesave ndërkufitare.
Duke paraqitur prioritetet e mëtejshme, ai veçoi operacionalizimin e pagesave të shpejta dhe zhvillimin gradual të shërbimeve shtesë, përfshirë pagesat përmes numrit të telefonit apo identifikuesve të tjerë, kodeve QR, kërkesën për pagesë (Request to Pay) dhe verifikimin paraprak të përfituesit.
Pjesëmarrja në këtë konferencë pasqyron angazhimin e BQK-së për modernizimin e pagesave, forcimin e bashkëpunimit rajonal dhe integrimin në ekosistemin evropian të pagesave.
Komunikata e plotë 🔗 https://short.do/CuTLuK