Bordi i Asociacionit të Komunave të Kosovës (AKK) mbajti takimin e parë pas Kuvendit të AKK-së, ku u miratuan njëzëri raportet e punës dhe financiare për vitin 2025, si dhe Plani i Punës dhe Buxheti për vitin 2026.

Megjithatë, vëmendja kryesore e diskutimit u përqendrua te sfidat serioze financiare me të cilat po përballen komunat.

Kontrata kolektive vazhdon të mbetet sfida më e madhe për pushtetin lokal. Sipas vlerësimeve të AKK-së, vetëm në 4 muajt e parë të vitit 2026, komunave të Kosovës u janë marrë rreth 55 milionë euro përmes vendimeve gjyqësore, ndërsa që nga viti 2022, kjo shumë ka tejkaluar 344 milionë euro.

Kjo situatë po ndikon drejtpërdrejt në: • uljen drastike të investimeve kapitale; • kufizimin e mjeteve për mallra dhe shërbime; • reduktimin e subvencioneve për qytetarët

Anëtarët e Bordit vlerësuan se, nëse kjo situatë vazhdon, komunat do të kenë mundësi shumë të kufizuara për zhvillim dhe përmirësim të shërbimeve publike gjatë vitit 2026.

AKK do të vazhdojë avokimin e fuqishëm për një zgjidhje të drejtë dhe të qëndrueshme, në mënyrë që komunat të mos penalizohen për obligime që nuk janë krijuar nga vetë ato.