Kuvendi i Kryeqytetit ka votuar krijimin e Ndërmarrjes Komunale “Pastrimi”, vendim të cilin kryetari i Prishtinës e ka cilësuar si një prej vendimeve më të rëndësishme për qytetarët e kryeqytetit.

Përmes një deklarate, kryetari ka thënë se Prishtina po kalon nga një kompani rajonale, e cila menaxhonte shërbimin për gjashtë komuna, në një ndërmarrje të vetën komunale.

“Prishtina po kalon në ndërmarrje të vetën, të Kryeqytetit, për Kryeqytetin dhe në shërbim të qytetarëve të tij”, ka deklaruar ai.

Sipas kryetarit, themelimi i ndërmarrjes paraqet fillimin e një sistemi të ri për menaxhimin e mbeturinave, ku Prishtina do të planifikojë dhe investojë vetë, do të rrisë kapacitetet dhe do të mbajë përgjegjësi të drejtpërdrejtë për pastërtinë e qytetit.

“Sot u votua për një zgjidhje afatgjatë për menaxhimin e mbeturinave në Kryeqytet dhe falënderoj të gjithë asambleistët që votuan për!”, ka shkruar ai.

Në fund, kryetari e ka përshëndetur vendimin me urimin për qytetarët e Prishtinës: “Urime, Prishtinë! Një kapitull i ri fillon sot”.