Ministri i Punës, Andin Hoti, ka njoftuar se 31.8 milionë euro janë dhënë nga Bashkimi Evropian për punësimin, arsimin dhe të rinjtë.

“Miratimi i 180.5 milionë eurove në kuadër të programeve IPA 2026 dhe IPA 2027 nga Bashkimi Evropian është një lajm i jashtëzakonshëm për Republikën e Kosovës”.

“Për Ministrinë e Punës, Familjes dhe Vlerave të Luftës Çlirimtare, një rëndësi të veçantë ka investimi prej 31.8 milionë eurosh në konkurrueshmëri, arsim dhe punësim”.

“Në qendër të këtij investimi është Skema e Garancisë për të Rinj, një nga reformat më të rëndësishme që po e zbatojmë. Qëllimi ynë është i qartë: çdo i ri në Kosovë të ketë mundësinë që, brenda një periudhe të shkurtër pas përfundimit të shkollimit ose mbetjes pa punë, të përfshihet në punësim, arsim, aftësim profesional ose praktikë pune”, ka shkruar Hoti në ‘Facebook’.

Ai ka theksuar se ky financim është dëshmi e besimit në reformat që po ndërmarrim dhe në vizionin tonë për zhvillimin e vendit.

“Me këtë rast, falënderoj Bashkimin Evropian për mbështetjen e vazhdueshme në fuqizimin e të rinjve, zhvillimin e arsimit dhe avancimin e mundësive për punësim në Republikën e Kosovës”, ka shkruar Hoti.